Wrth ddewis astudio BA Creu Cyfryngau ym Mhrifysgol Aberystwyth, cewch brofiad creadigol a bywiog heb ei ail. Byddwch yn astudio mewn adeilad modern sy’n cynnig cyfleusterau gwych, a staff brwdfrydig fydd yn eich ysbrydoli. Cewch ymwneud â phartneriaid megis y BBC, S4C, Boom, Fiction Factory, Theatr Genedlaethol Cymru, Cwmni Theatr Arad Goch a llu o rhai eraill. Mae’r cwrs yma wedi ei ddylunio i sicrhau fod cydbwysedd rhwng profiad beirniadol a chreadigol, ac mae’n galluogi ein myfyrwyr i ddatblygu eu sgiliau deallusol, creadigol a thechnegol.

**Pam astudio Creu Cyfryngau yn Aberystwyth?**
- Adran egnïol a chreadigol lle daw drama a theatr, ffilm a’r cyfryngau, a senograffeg a dylunio theatr ynghyd.

- Cyfuniad unigryw o ddulliau creadigol a beirniadol o ymdrin â’r pwnc.

- Staff dysgu rhagorol ag ystod eang o arbenigedd ym maes ymchwil a chreu cyfryngau yn broffesiynol.

- Cysylltiadau â phartneriaid allweddol yn y diwydiant fel BBC, S4C, BAFTA Cymru, Gŵyl Ffilm Tribeca (Efrog Newydd), Fiction Factory, Tinopolis, Gŵyl Ffilm Rhyngwladol Caeredin, Archif Sgrin a Sain Llyfrgell Genedlaethol Cymru ac Avid. Mae'r partneriaid hyn yn rhoi cyfle gwych i chi rwydweithio a chysylltu â'r diwydiant cyn graddio.

- Cyfleusterau ac adnoddau rhagorol ar gyfer gwaith ymarferol: tair stiwdio ymarfer, pob un ag adnoddau technegol hyblyg; 2 stiwdio fawr ag offer o safon broffesiynol a rigiau goleuadau digidol a reolir drwy ETC Congo a phaneli rheoli Strand Lighting, offer PA Yamaha a Soundcraft, systemau clyweledol Sanyo a goleuadau Strand, a dau NXAMP; yn ogystal â chyfleusterau gwisgoedd a wardrob.

- Cysylltiadau agos â Chanolfan y Celfyddydau ar y campws, sef un o’r canolfannau celfyddydau mwyaf yng Nghymru, sy’n cyflwyno gwaith theatr a dawns cenedlaethol a rhyngwladol yn rheolaidd.

- Cymdeithasau drama egnïol myfyrwyr Prifysgol Aberystwyth.

- Lleoliad daearyddol unigryw.

- Cyfleoedd cyfnewid cyffrous yn Ewrop ac yn rhyngwladol.

**Cyflogadwyedd**
Mae cyflogadwyedd yn rhan annatod o’n holl weithgareddau. Byddwch yn dysgu sgiliau gwerthfawr y mae galw mawr amdanynt ymhlith cyflogwyr. Yn eu plith mae: gweithio’n effeithiol mewn grŵp i ddatblygu, ymarfer a chynhyrchu digwyddiadau byw; defnyddio sgiliau creadigol, dyfeisgar a datrys problemau mewn amryw o sefyllfaoedd; ymchwilio, a chloriannu a threfnu gwybodaeth; saernïo a chyfleu syniadau’n effeithiol mewn amryw o sefyllfaoedd ac mewn amryw o ffyrdd; gweithio’n annibynnol a gydag eraill; trefnu'ch amser a defnyddio'ch sgiliau’n effeithiol.

**Beth fyddwch chi'n ei astudio?**

Bydd y crynodeb isod yn rhoi darlun i chi o'r hyn y mae'n bosibl y byddwch yn ei astudio yn ystod y cynllun gradd tair blynedd.

**Y flwyddyn gyntaf:**
egwyddorion a sgiliau pob cam o'r broses gynhyrchu: ysgrifennu sgriptiau, saethu, cyfarwyddo a golygu; dulliau cyfoes o greu ffilmau a fideo, ynghyd â gwaith aml-gyfryngol byw; amodau gwaith a heriau cyfoes i’r diwydiannau creadigol yng Nghymru a thu hwnt; sut i greu cwmni creadigol ar gyfer cyflwyno gwaith ensemble; datblygiadau allweddol yn hanes, theori a dadansoddiad ffilm a theledu.

**Yr ail flwyddyn:**
dulliau cyfoes o greu a chyflwyno traethodau fideo; gwaith cynhyrchu ar raddfa lawn dan gyfarwyddyd aelodau staff; technegau cynhyrchu, gwneud ffilmiau dogfennol ac ysgrifennu ar gyfer ffilm a theledu; agweddau ar hanes ffilm, teledu a’r diwydiannau creadigol yn Nghymru ac ar draws y byd; agweddau ar berthynas y cyfryngau a’r gymdeithas gyfoes.

**Y flwyddyn olaf:**
creu gwaith creadigol annibynnol; cwblhau prosiect ymchwil mawr ac astudiaethau damcaniaethol uwch; mireinio sgiliau mewn prosiectau cynhyrchu unigol ac mewn grŵp; datblygu sgiliau mentergarwch drwy archwilio cyflwr cyfoes y diwydiannau creadigol; sgriptio ar gyfer cynyrchiadau cyfryngol ac amlgyfrwng llawn; paratoi a chynllunio gyrfa greadigol.